NGA AEROPORTI I SHKUPIT: Ajet ka filluar fluturimet sezonale për në Ankara, Çukurova dhe Dijarbakër në Turqi

Aeroporti Ndërkombëtar Shkup është lidhur me tre qytete të tjera në Turqi që nga 1 qershori. Fundjavën e kaluar, linja ajrore AJet filloi të fluturojë për në Ankara, Çukurova dhe Dijarbakër, tre destinacione të reja pushimesh, njoftoi operatori i aeroportit TAV Maqedoni.
Fluturimet sezonale nga Shkupi për në Ankara dhe Dijarbakër do të operojnë një herë në javë, ndërsa fluturimet e AJet për në Aeroportin e Çukurovës do të operojnë dy herë në javë, dhe të tre destinacionet do të shërbehen nga 1 qershori deri në fund të shtatorit.
"Lidhja direkte e Aeroportit Ndërkombëtar Shkup me tre destinacionet e reja në Turqi është me rëndësi të madhe në shumë aspekte, sepse secila zonë sjell përfitimet e veta. Lidhja e dy kryeqyteteve, Shkupit dhe Ankarasë, do të kontribuojë në rritjen e shkëmbimit tregtar, logjistikën e shpejtë të biznesit midis Maqedonisë dhe Turqisë, qasjen e lehtë në tregun turk, lëvizshmërinë e biznesit, shkëmbimin turistik dhe kulturor, bashkëpunimin arsimor dhe akademik, lidhjen e komuniteteve, dhe gjithashtu do të kontribuojë në përmirësimin e mëtejshëm të marrëdhënieve politike dhe diplomatike", tha Nexhat Kurt, Drejtor i Përgjithshëm i TAV Maqedoni.

Vendosja e lidhjes ajrore midis Shkupit dhe Çukurovës dhe Dijarbakërit do të sjellë përfitime të konsiderueshme strategjike, ekonomike, turistike dhe kulturore për vendin, sipas TAV Maqedoni.
Çukurova është një zonë e madhe pjellore që përfshin Adanën, një qendër industriale dhe bujqësore, dhe Mersinin, një potencial turistik, një destinacion në bregdetin turk të Mesdheut. Gjithashtu e rëndësishme është se në Maqedoni ka një popullsi të madhe me origjinë nga këto dy zona, gjë që do të lehtësojë komunikimin dhe ruajtjen e lidhjeve familjare.
Me tre destinacionet e reja, linja ajrore AJet nga Aeroporti Ndërkombëtar Shkup do të ketë gjithsej 4 destinacione, duke përfshirë linjën ekzistuese për në Stamboll, në Aeroportin Sabiha Gokçen.
Në sezonin aktual veror 2025, gjithsej katër linja ajrore fluturojnë midis Turqisë dhe Maqedonisë, në gjithsej 6 qytete dhe 7 aeroporte në Turqi. Nga Aeroporti Ndërkombëtar Shkup dhe Aeroporti Shën Pali Apostull i Ohrit, Turkish Airlines fluturon për në Stamboll (Aeroporti IGA); Pegasus Airlines fluturon nga Aeroporti Shkup për në Stamboll (Aeroporti Sabiha Gokëen), Izmir dhe Antali, AJet gjithashtu fluturon nga Shkupi për në Stamboll (Aeroporti Sabiha Gokçen), ndërsa Sun Express fluturon nga Shkupi për në Antali dhe Izmir.