ТАВ МАКЕДОНИЈА: ГИ ОТВОРАМЕ МЕЃУНАРОДНИОТ АЕРОДРОМ СКОПЈЕ И АЕРОДРОМОТ СВ. АПОСТОЛ ПАВЛЕ ОХРИД ОД ПРВИ ЈУЛИ СО НОВИ ПРАВИЛА ЗА ПАТУВАЊЕ

ТАВ МАКЕДОНИЈА: ГИ ОТВОРАМЕ МЕЃУНАРОДНИОТ АЕРОДРОМ СКОПЈЕ И АЕРОДРОМОТ СВ. АПОСТОЛ ПАВЛЕ ОХРИД ОД ПРВИ ЈУЛИ СО НОВИ ПРАВИЛА ЗА ПАТУВАЊЕ

Патниците ќе треба да пристигнат на аеродромот најмалку 3 часа пред нивниот лет, да носат заштитна маска постојано, да одржуваат физичко растојание и висок степен на лична хигиена


Согласно Одлуката на Владата на Република Северна Македонија донесена на 23-ти јуни 2020 година, за повторно отворање на Меѓународниот Аеродром Скопје и Аеродромот Свети Апостол Павле Охрид од 1-ви јули 2020 година, по нивното затворање на 19-ти и на 16-ти март годинава, ТАВ Македонија ја информира јавноста дека двата аеродроми ќе се отворат за патнички летови почнувајќи од следната среда, 1-ви јули, со тоа што воведува нови правила за патување, со цел спречување на влез и ширење на COVID-19.  

-Во периодот по затворањето на скопскиот и охридскиот аеродром со одлуките на Владата, со цел да се запре ширењето на КОВИД-19 во земјава, интензивно се подготвувавме за повторно отворање на двата аеродроми. Ги следевме искуствата на другите аеродроми во светот со цел да видиме што тие спроведуваат и да ги искористиме најдобрите практики за да понудиме аеродромски услуги кои ќе овозможат соодветна хигиенска и здравствена заштита, со цел патниците, персоналот и партнерите да се чувствуваат безбедно. Притоа ги следевме препораките на Министерството за здравство, Светската здравствена организација (WHO), Агенцијата за воздухопловна безбедност на Европската Унија (EASA), Меѓународната организација за цивилно воздухопловство (ICAO), Меѓународниот Совет на Аеродроми (ACI) и Меѓународната асоцијација за авиосообраќај (IATA), сè со цел да преземеме соодветни мерки навреме. Она што е најважно за патниците е следното – да пристигнат на аеродромите најмалку 3 часа пред нивниот лет, да стават заштитна маска пред да влезат во терминалната зграда на аеродромот, да ги дезинфицираат обувките и рацете на самиот влез во зградата и постојано да одржуваат физичко растојание, вели Алпер Ерсој, Генерален директор на ТАВ Македонија. 
Како што објаснуваат од ТАВ Македонија во однос на Меѓународниот Аеродром Скопје, при Заминувања (Departures), единствен отворен влез за патниците во терминалната зграда ќе биде влезот “Departures C”, при што пред влегување секој патник ќе треба да стави заштитна маска, да ја покаже авионската карта (печатена или на телефон) на нашите агенти за безбедност и потоа да помине преку патосница за дезинфекција на чевлите, а потоа и да ги дезинфицира рацете на безконтактните диспанзери за дезинфекција на раце, поставени на самиот влез од зградата. 
-По соодветната дезинфекција на обувките и рацете, на сите патници на влезовите во  терминалните згради на двата аеродроми, ќе им биде проверена телесната температура, преку термалните камери кои ние како аеродромски оператор ги набавивме, со цел да спречиме влез на вирусот во аеродромските згради, при заминување од државата. По скенирањето со термалната камера, доколку немаат покачена телесна температура, патниците ќе можат да продолжат кон шалтерите за регистрација или саморегистрација. Она што е важно за целата јавност е да знае дека во аеродромската зграда ќе можат да влезат само лицата кои патуваат, а не и нивните семејства и пријатели кои ги испраќаат или ги чекаат да пристигнат, објаснува Ерсој. 

Како што велат од ТАВ Македонија, информативни знаци во вид на банери, налепници и билборди се поставени насекаде низ аеродромите, со цел да ги потсетуваат патниците да држат физичко растојание, да одржуваат висок степен на лична хигиена и да избегнуваат допирање на површините.
  
-Не е дозволено седење еден до друг на седиштата во чекалните на аеродромот, на Заминувања (Departures), Пристигнувања (Arrivals) и кај Излезите (Gates), туку патниците ќе треба да седат на соодветното физичко растојание, а за таа цел седиштата се посебно обележани, објаснуваат од ТАВ Македонија. 
    
Со цел патниците да се чувствуваат безбедно, ТАВ Македонија го интензивира чистењето и дезинфекцијата на сите површини на аеродромите, додека пак вентилацијата во терминалната зграда е исто така зголемена, со системот за климатизација кој користи F9 нано-хемиски филм-обложени филтри. Дополнително, низ целата терминална зграда на аеродромот поставени се диспанзери со средство за дезинфекција на рацете.
-Уште од првиот случај на КОВИД-19 во земјата, почнавме зачестено да чистиме и дезинфицираме, поинтензивно од вообичаеното. Особено на местата на аеродромот каде што патниците најмногу се задржуваат, коишто се најмногу подложни на допирање. На пример шалтерите за регистрација, рачките од вратите и ескалаторите, екраните, држачите, копчињата за лифтови, пунктовите за саморегистрација и завиткување багаж, количките за багаж и сите други предмети идентификувани како најчесто допирани површини, се дезинфицираат 4 пати дневно.Пред реотворањето на аеродромот, сето ова го срочивме во наши нови интерни правила, коишто точно го пропишуваат начинот на дезинфекција и соодветните средства за таа намена, објаснува Ерсој.

Со оглед на новите правила за патување наметнати од глобалната пандемија предизвикана од КОВИД-19, некои од аеродромските процедури ќе се одвиваат побавно, вели генералниот директор на ТАВ Македонија. 

Со цел да се избегне создавање непотребен метеж на шалтерите за регистрација, од ТАВ Македонија ги охрабруваат патниците што повеќе да ја користат опцијата за онлајн регистрација на патници и багаж за летовите од скопскиот аеродром, најмалку 24 часа пред времето на полетување. Истата е достапна преку веб-страницата на аеродромот, каде што преку посебни икони секој патник може да пристапи до делот за онлајн регистрација од веб-страниците на авиокомпаниите. 
 
Од ТАВ Македонија нагласуваат дека во делот на безбедносната проверка патниците ќе треба дисциплинирано да ги следат упатствата на агентите за безбедност, и таму, како и при сите процедури каде што се создаваат редици, потребно ќе биде да се држи пропишаното физичко растојание. Сите површини кои се во допир со патници на овој пункт исто така  се  дезинфицираат  зачестено, додека пластичните корпи во кои патниците го ставаат багажот, ќе се дезинфицираат по употребата.
 
При Излез од аеродромската зграда, пред влез во коридорот, патничкиот мост и потоа во авионот, патниците пак ќе треба да ги дезинфицираат рацете, за што и на тие места ТАВ Македонија има поставено диспанзери за дезинфекција на раце.
       
-Апелираме до патниците да пристигнат на аеродромот најмалку 3 часа пред времето на полетување, затоа што најмалку 1 час пред времето на полетување тие веќе треба да бидат во бординг зоната, односно на Излезите (Gates). Со почитување на засилените санитарни мерки кои ги воведовме и одржување на физичко растојание, пред се од наша страна како аеродромски персонал, а потоа и од страна на патниците, заеднички ќе се заштитиме од коронавирусот. Здравјето е најважната работа за сите нас. Со нетрпение чекаме повторно да ги опслужиме нашите патници, да ги обединиме со нивните семејства и пријатели и да им овозможиме да откриваат нови дестинации, вели Ерсој.
 
Во врска со распоредот на летање, којшто не зависи само од Одлуката на Владата за реотворање на аеродромот за патнички летови, туку и од одлуките на авиокомпаниите, како и земјите до чии дестинации се леташе од Меѓународниот Аеродром Скопје и Аеродромот Свети Апостол Павле Охрид, пред коронавирус-кризата, ТАВ Македонија ги упатува сите патници да ги следат веб-страниците на двата аеродроми, каде што ќе бидат објавени најновите распореди на летање. 

-Со оглед на тоа што информациите за летовите се менуваат многу брзо, а ние како аеродромски оператор ги ажурираме како што ги добиваме од страна на авиокомпаниите, апелираме до сите патници да ги следат нашите веб-страници http://skp.airports.com.mk/  и http://ohd.airports.com.mk/  каде што промените во распоредот на летање се ажурираат во реално време, појаснуваат од ТАВ Македонија. 
  
Меѓународниот Аеродром Скопје беше затворен за патнички летови од 19-ти март 2020, додека Аеродромот Св. Апостол Павле Охрид од 16-ти март 2020, со Одлуки на Владата, со цел спречување на влез и ширење на коронавирусот. Во изминатите 3,5 месеци, на аеродромот во главниот град имаше само хуманитарни, владини, санитарни, медицински и воени летови. 

Како резултат на запрените операции, ависообраќајот на Меѓународниот Аеродром Скопје и Аеродромот Св. Апостол Павле Охрид кој во изминатите 10 години стабилно се развиваше и рушеше рекорди во бројот на превезени патници, во првите пет месеци од 2020 година доживеа сериозен удар. ТАВ Македонија од јануари до мај 2020 забележа 53% намалување на бројот на патници и 47% намалување на бројот на летови, во однос на истиот период од 2019 година. 

Covid19: Патувајте безбедно – ПРАШАЊА И ОДГОВОРИ

- Редовно и навремено ги применуваме сите мерки на Владата и на Министерството за здравство, како надлежни државни институции. Секако, ги следиме и искуствата на другите аеродроми ширум светот и препораките на Светската здравствена организација (WHO), Агенцијата за воздухопловна безбедност на Европската Унија (EASA), Меѓународната организација за цивилно воздухопловство (ICAO), Меѓународниот совет на аеродроми (ACI) и Меѓународната асоцијација за авиосообраќај (IATA), сè со цел да преземаме соодветни мерки навреме, како што се менуваат условите во оваа глобална пандемија.

Од 19.8.2021, 21:00ч, влез во аеродромската терминална зграда ќе биде дозволен само со приложување:  

 
-    Сертификат / потврда за извршена имунизација (вакцинација) од вирусот SARSCoV-2, односно примена најмалку прва доза на вакцина против заразната болест COVID-19; или
-    Сертификат / потврда за прележан COVID19 во последните 45 дена, сметајќи од денот на оздравувањето; или
-    Медицинска потврда со негативен резултат од RT PCR SARSCoV-2 тест, не постар од 72 часа, или брз антиген тест не постар од 48 часа, пред влегување.

*Ова не се однесува на лица под 18 години.

 
Влезот во аеродромската терминална зграда е на вратата Заминување С, додека излезот е на вратата Пристигнување В.

-    Задолжително е патниците да стават заштитна маска на лицето пред да влезат во терминалната зграда на аеродромот и да ја носат постојано додека се движат низ аеродромот, сè додека не излезат од терминалната зграда и се качат во авион. Во однос на правилата за летот со авион, патниците треба да ги следат барањата на авиокомпанијата со која патуваат.  
На патниците кои не носат заштитна маска нема да им биде дозволен влез во зградата на аеродромот.

-    И покрај постоењето на опцијата за онлајн пријавување, поради новонастанатите Ковид-19 рестрикции, патниците се должни, при нивното пристигнување на аеродромот, да се пријават на шалтерите за пријавување, за проверка и верификација на документите потребни за влез во државата во која патуваат, како и пријавување на нивниот багаж. 

-    Патниците ќе треба дисциплинирано да ги следат упатствата на агентите за обезбедување, и таму, како и при сите процедури каде што се создаваат редици, потребно ќе биде да се држи физичко растојание од најмалку 1,5 метар.

- Им препорачуваме на патниците да пристигнат на аеродромот најмалку 3 до 4 часа пред нивниот лет. Поради новите мерки за заштита од COVID-19, некои од аеродромските процедури може да траат подолго време.

    Бизнис и ВИП Салонот се чистат и дезинфицираат според пропишаното од страна на јавните здравствени власти, со зголемена фреквенција врз основа на авиосообраќајот.

    Обезбедена е соодветна заштита за вработените, која вклучува опрема за лична заштита, како ракавици, заштитни маски, очила или штитови за лице.

    Поставени се и информациски знаци и ознаки на подот за да се поттикне физичко растојание, како и повеќе диспанзери со средство за дезинфекција, врз база на алкохол, со соодветна ознака за патниците.

    Сите производи кои се сервираат во салоните ќе бидат изложени спакувани во фолија и сите гости ќе можат да ги добијат производите во индивидуални пакувања.

    Има опција за самопослужување со цел патниците да имаат ограничен контакт со персоналот.

- Се врши честа дезинфекција на површините кои се често се во допир со персоналот и патниците,

- Поставени се посебни корпи за отпадоци за искористените маски и ракавици.

- Масите и столчињата се дезинфицирани по нивно користење.

- Сите вработени во продавниците носат заштитна опрема. Вграден е и плексиглас сепаратор со цел да се избегне контакт помеѓу касата и гостите.

- На влезот на рестораните се поставени апарати за дезинфекција за персоналот и гостите.

- Преку водечки знаци, гостите се потсетуваат на правилата за социјално дистанцирање што треба да ги следат, особено кај редовите кај местата за нарачки и плаќање.

- Во сите ресторани, капацитетот е намален и растојанието помеѓу масите е зголемено. По четири столици се поставени на сите маси.

- Послужавниците и чиниите ќе бидат отстранети од вообичаените области. Тие се даваат на гостите од страна на службениот персонал.

- Се користат пакувани производи за еднократна употреба наместо производите како што се сол, шеќер, салфетки, итн. Производите за еднократна употреба (сламки, салфетки, итн.) се отстранети од заедничката област и ќе бидат служени на гостите од страна на службениот персонал.

- Кај редовите кај местата за нарачки и плаќање, поставени се налепници на подот на растојание (1,5метар).

Вработените работат со заштитна опрема.

- Опремата која се користи  редовно се дезинфицира.

- Физичкото растојание од 1,5метар е минимално во просторот за сите присутни лица и за таа цел околу подот на бесцаринските продавници се поставени водечки знаци.

- Ги советуваме клиентите да користат само безконтактна кредитна или дебитна картичка.

- Означени се стриктни влезни места во продавниците, каде ќе се користат апарати за дезинфекција врз основа на алкохол пред влегување во бесцаринските продавници.

- На патниците кои не носат маска нема да им биде дозволен влез во продавницата.

- Во бесцаринските продавници се дозволени не повеќе од 10 клиенти истовремено.

-    Патниците треба да пристигнат на аеродромот најмалку 3 до 4 часа пред нивниот лет, затоа што најмалку 1 час пред времето на полетување шалтерите за пријавување се затвораат. Ова значи дека патниците најмалку 1 час пред времето на полетување треба да ја имаат завршено процедурата за пријавување, a потоа и процедурите за Пасошка контрола и безбедносна проверка, со цел навреме да пристигнат во зоната за качување во авион, односно кај Излезите. Задолжително е патниците да носат заштитна маска, да го одржуваат пропишаното физичко растојание за затворени простории и да одржуваат  високо ниво на лична хигиена.

Од 1 септември 2021 година домашни и странски државјани ќе можат да влезат на територијата на Република Северна Македонија доколку претходно на граничниот премин приложат:
•    сертификат/потврда за извршена имунизација (вакцинација) од вирусот SARS-CoV-2, односно примени најмалку две дози на вакцина против заразната болест COVID-19 (сите вакцини се прифатливи и потребно е да се поминати 14 дена од денот на аплицирање на втората доза); или
•    сертификат/потврда за прележан COVID-19 во последните 45 дена, сметајќи од денот на оздравувањето; или
•    медицинска потврда со негативен резултат од RT PCR SARS-CoV-2 тест, направен 72 часа пред влез на територијата на Република Северна Македонија или
•    негативен резултат од брз тест за антиген, направен 48 часа пред влез на територија на Република Северна Македонија.
И за домашни и за странски државјани кои ќе се вратат во земјата по 1 септември и немаат негативен PCR тест, негативен антиген тест или потврди за вакцинација или за прележан КОВИД-19, мерка за карантин од 7 (седум ) денови на домашна изолација ќе се определат со одлука на Државниот санитарен и здравствен инспекторат. Трошоците за изолација за странски државјани се на нивна сметка.
Странските државјани што транзитираат низ земјата ќе можат да го сторат тоа во рок од 5 часа со претходно потпишана изјава за влез во земјата што ќе треба да ја достават пред граничната контрола на излез од земјата.
Исклучоци од оваа мерка се екипажите на воздухопловите и професионалните возачи на товарни моторни возила кои влегуваат на граничните премини на територијата на Република Северна Македонија, како и сите видови групни или индивидуални патувања или патници и професионални возачи на товарни моторни возила кои транзитираат низ територијата на Република Северна Македонија, зашто задолжително потпишуваат Изјава за транзитирање.

Оваа одлука не се однесува за лица под 18 годишна возраст.

-    На двата аеродрома има можност за правење на КОВИД-19 тестови пред вашето заминување. 
Лабораториите на клиниката Жан Митрев и Никоб Лаб вршат тестирање на патници на аеродромите. Повеќе информации можете да најдете на линковите подолу.


Меѓународен Аеродром Скопје:
https://zmc.mk/en/covid19/skopje-ohrid-airport-covid-19-testing-point/ 

https://nikoblab.mk/ 

Аеродром Св. Апостол Павле Охрид: 
https://zmc.mk/en/covid19/skopje-ohrid-airport-covid-19-testing-point/  

http://ohd.airports.com.mk/mk-MK/media-centre-mk/announcements-mk/page/announcement-covid-testing-airport-ohrid-mk 

-    ТАВ Македонија, како оператор на аеродромите, работи во согласност со правилата и прописите на државните институции во земјите каде патуваат патници, пограничните институции на аеродромите и авиокомпаниите.
За информации во врска со моменталните рестрикции за патување по воздушен пат и потребните документи за патување, Ве молиме да се обратите до релевантната амбасада на државата во која сакате да патувате како и до авиокомпанијата со која ќе патувате.

Дополнително, Од 1 септември 2021 година домашни и странски државјани ќе можат да излезат од територијата на Република Северна Македонија доколку претходно на граничниот премин приложат:
•    сертификат/потврда за извршена имунизација (вакцинација) од вирусот SARS-CoV-2, односно примени најмалку две дози на вакцина против заразната болест COVID-19 (сите вакцини се прифатливи и потребно е да се поминати 14 дена од денот на аплицирање на втората доза); или
•    сертификат/потврда за прележан COVID-19 во последните 45 дена, сметајќи од денот на оздравувањето; или
•    медицинска потврда со негативен резултат од RT PCR SARS-CoV-2 тест, направен 72 часа пред влез на територијата на Република Северна Македонија или
•    негативен резултат од брз тест за антиген, направен 48 часа пред влез на територија на Република Северна Македонија.
Оваа одлука не се однесува за лица под 18 годишна возраст.